Home / La idea
Quatter linguas – in chanal da televisiun: idéeplus
idéeplus collia la Svizra – cun las meglras emissiuns da televisiun dal pajas sin in nov chanal. idéeplus vul nizzegiar l’offerta da program existenta e reutilsar quella sin plaun naziunal. idéeplus fa punts sur ils cunfins linguistics, rinforza la visibilitad vicendaivla tranter las regiuns e promova la chapientscha interculturala sco er la coerenza naziunala. idéeplus – ina plivalur per dapli Svizra.
idéeplus – ina plivalur per dapli Svizra
Il chanal da televisiun svizzer idéeplus vul
- reutilisar per l’entira Svizra offertas da program existentas
- construir punts sur ils cunfins linguistics
- rinforzar la percepziun vicendaivla tranter las regiuns linguisticas
- meglierar la chapientscha interculturala
- promover la coerenza naziunala
Basas giuridicas
Idéeplus po vegnir realisà sin fundament da las basas legalas existentas en la constituziun ed en la lescha federala da radio e televisiun. idéeplus pussibilitescha a la SRG SSR idée suisse da realisar sia incumbensa legala.
Realisaziun tecnica
Las emissiuns dad auta qualitad gia existentas da SF, TSR, TSI, TvR u dad autras staziuns pon vegnir reutilisadas cun suttitels u sincronisaziun (tun sin divers chanals) e derasadas sur idéeplus per in public en l’entira Svizra. Quai tut per custs bass.
Quant custa idéeplus?
idéeplus funcziuna cun la plivalur da programs dad auta qualitad gia existents. Quels duain vegnir reutilisads sin plaun surregiunal e derasads en il rom da la SRG SSR idée suisse per in public en tut las regiuns svizras. Ina realisaziun favuraivla è pussaivla, sche las sinergias vegnan explotadas consequentamain e las capacitads existentas nizzegiadas optimalmain.
Vuschs
Dapi la dieta naziunala per in chanal da televisiun surregiunal (favrer 2009 a l’universitad da Berna) ha l’idea chattà gronda resonanza: Exponentas ed exponents da la politica, da las medias e da la cultura sustegnan il project che fa punts sur ils cunfins linguistics.